Lees verder oor die oorsake van hoë bloedsuikervlakke en hoe om dit te verlaag
Hoë bloedsuiker, ook genoem hiperglukemie, affekteer mense met diabetes. Daar is baie faktore wat jou bloedsuiker (glukose) vlakke laat styg – gelukkig is daar baie wat jy kan doen om hoe bloedsuikervlakke te vermy.
Chroniese hoë bloedsuikervlakke kan ernstige gesondheidskomplikasies hê. Indien onbehandeld gelaat word, kan hiperglukemie lewensgevaarlik wees aangesien dit tot ‘n diabetiese koma kan lei. Selfs as jou hiperglukemie nie ernstig is nie, sal dit met verloop van tyd jou oë, niere, senuwees en hart beïnvloed. Dit kan lei tot blindheid, niersiekte, amputasie en hartsiektes.
Bloedsuikervlakke en jou liggaam
Die liggaam het energie nodig om te funksioneer en een van sy primêre energiebronne is glukose. Jou liggaam breek koolhidrate af van voedsel soos brood, rys en pasta en stel glukose in jou bloedstroom vry. Glukose kan nie jou bloed verlaat en jou selle binnedring sonder enige hulp nie. Dit is die hormoon, insulien, se werk om glukose uit jou bloedstroom en na jou selle te vervoer en so te verhoed dat glukose in jou bloedstroom opbou.
Mense met diabetes sukkel om hul bloedsuikervlakke te bestuur, aangesien hulle dit nie kan verlaag nie. Hul bloedsuikervlakke is voortdurend hoog. Dit gebeur omdat hul liggame nie insulien produseer nie (tipe 1-diabetes) of nie die insulien wat dit maak effektief kan gebruik nie (tipe 2-diabetes). Dit lei tot hiperglukemie. Om bloedsuikervlakke van mense met diabetes te verlaag, word insulien toegedien. Jou gesondheidsorgverskaffer kan jou ook aanraai om ‘n paar leefstylveranderinge aan te bring om hoë bloedsuikervlakke te bestuur.
Wees op die uitkyk vir die volgende dinge wat jou bloedsuikervlakke beïnvloed:
- Jy neem te veel of nie genoeg insulien of orale diabetesmedikasie nie.
- Jy eet te veel koolhidrate en die hoeveelheid glukose in jou liggaam balanseer nie met die hoeveelheid insulien wat jy produseer of toedien nie.
- Jy is nie aktief genoeg nie. Om elke 30 minute aktief te wees, sal veroorsaak dat jou liggaam meer energie benodig en dit sal die glukosevlakke in jou bloed verlaag.
- Jy het ‘n verkoue, griep of ‘n infeksie. Hormone wat siektes beveg, kan jou bloedsuikervlakke laat styg.
- Jy het emosionele stres. Of jy stres oor ‘n gesinskwessie of werksprobleem, jou bloedsuikervlakke sal toeneem omdat hormone wat deur stres vrygestel word, jou bloedsuikervlakke laat styg.
- Sekere medikasie soos steroïede of immuunonderdrukkers kan jou bloedsuikervlakke verhoog.
- Die dagbreek-verskynsel (‘n oplewing van hormone wat die liggaam elke oggend omstreeks 04:00 tot 05:00 produseer) beïnvloed jou.
Hoe om jou bloedsuikervlakke te verlaag
1. Hou jou bloedsuikervlakke dop
Vra jou gesondheidsorgverskaffer hoe gereeld jy moet toets. Met tipe 1-diabetes, tussen 4 en 10 keer per dag. As jy insulien gebruik vir tipe 2, dalk ‘n paar keer per dag. Sonder insulien, dalk daagliks.
2. Volg ‘n diabetes-dieet
Beperk voedsel hoog op die glukemiese indeks. Vervang suiker en verfynde koolhidrate met heelkosse.
3. Herinner jouself om te beweeg
Staan elke 30 minute op en beweeg. Gaan stap, vee die vloer, of doen huishoudelike take.
4. Versterk jou immuunstelsel
Maak seker jy eet kos soos sitrus, papaja, gemmer, spinasie en broccoli.
5. Bestuur jou stresvlakke
Praat met jou dokter oor angs. Oefen joga, meditasie, of asemhalingsoefeninge.
6. Voorkom die dagbreek-verskynsel
Moenie koolhidrate eet voor slaap nie. Oorweeg insulientoediening net voor jy gaan slaap, indien aanbeveel deur jou dokter.
Samevatting
Onbehandelde hiperglukemie het ernstige gevolge. Hou jou bloedsuikervlakke dop, verander jou leefstyl, en vermy komplikasies wat met diabetes gepaard gaan.
