Wees op die uitkyk vir die subtiele tekens van hoë bloeddruk
Hoë bloeddruk, ook bekend as hipertensie, is ‘n algemene gesondheidstoestand waarvan die lyer nie altyd bewus is nie, aangesien daar dikwels geen waarskuwingstekens is nie. Hoë bloeddruk kan lei tot groot gesondheidskwessies, soos hartsiektes of beroerte. Dit is ‘n algemene toestand wat die liggaam se are affekteer. As jy aan hoë bloeddruk ly, plaas jou bloed te veel druk op jou arteriële wande en dit dwing jou hart om harder te werk om bloed deur jou liggaam te pomp.
Kyk uit vir die volgende simptome van hoë bloeddruk
Borspyn (Angina)
Borspyn is die mees algemene simptoom van hoë bloeddruk en kan voorkom sonder dat enige ander simptome teenwoordig is.
Asemhalingsprobleme
Hoë bloeddruk kan jou bloedvate beïnvloed deur hul buigsaamheid te verminder, wat op sy beurt bloedvloei na jou hart verminder, wat kan lei tot simptome soos borspyn. As jy ‘n hipertensiewe krisis ervaar, kan jou borspyn toeneem wat kan lei tot moeilike asemhaling.
Hoofpyne
‘n Hoofpyn kan tydens periodes van baie hoë bloeddruk voorkom, wat ekstra druk op die brein kan plaas. Die druk kan ernstige gevolge teweegbring – bloed uit die bloedvate kan in die brein lek.
Verwarring en duiseligheid
Verwarring en duiseligheid het ‘n soortgelyke oorsprong as hoofpyn en vind plaas wanneer daar te veel druk op jou brein is en daar abnormale bloedvloei na jou brein toe is. Dit gebeur tydens ‘n hipertensiewe krisis of as jou bloeddruk swak beheer word. As hierdie hipertensiewe simptome geleidelik vererger kan dit lei tot ‘n beroerte of bloeding op die brein.
Visie- of spraakprobleme
Baie simptome van hoë bloeddruk word nie ten volle verstaan nie, maar daar word voorgestel dat die spanning op jou bloedvatwande jou bloedvate en senuwees beskadig.
Dit kan lei tot spraakprobleme of sigprobleme, aangesien jou oë baie klein bloedvate bevat wat tydens ‘n hipertensiewe noodgeval aangetas word.
Gesonde leefstylveranderinge
Hoe weet jy of jy aan hoë bloeddruk ly? Die enigste werklik betroubare aanwyser is ‘n bloeddruktoets wat deur mediese personeel toegedien word. As jy aan enige van die bogenoemde simptome ly, is dit belangrik om bewus te wees van jou bloeddrukvlakke – om die probleem te diagnoseer is van kardinale belang. Jy kan met jou dokter praat oor medikasie wat jou simptome sal verminder of verlig. Dit is ook belangrik dat jy gesonde leefstylveranderinge maak.
Die leefstylveranderinge sluit ‘n toename in fisiese oefening in, die vermindering van jou natrium-inname en die verhoging van jou inname van vrugte en groente. Die bestuur van jou stresvlakke en liggaamsgewig en die verbetering van jou slaappatrone is ook baie belangrik. Ten slotte word dit sterk aanbeveel om alkohol, sigarette of dwelmgebruik te verminder of heeltemal te vermy.
Risiko faktore
Alhoewel dit moeilik is om te weet of jy aan hoë bloeddruk ly sonder om ‘n toets te neem, kan jy jou kanse om die toestand te kry verminder deur sommige risikofaktore te verminder.
Wees bewus van die volgende risikofaktore:
- Om oorgewig te wees
- ‘n Hoë inname van natrium
- Min tot geen oefening
- ‘n Hoë inname van alkohol of koffie
- Rook
- Te min slaap
- Om ouer as 65 te wees
- Familiegeskiedenis van hoë bloeddruk
Samevatting
Wees op die uitkyk vir die simptome van hoë bloeddruk sodat jy die toestand doeltreffend kan beheer. As jy borspyn, moeilik asem haal en visie- of spraakprobleme ervaar, sal dit die beste wees om jou dokter te vra om jou bloeddruk te toets. Wees ook bedag daarop om moontlike hoë bloeddruk risikofaktore te verminder.
