Hoë bloedsuikervlakke in die oggend kan dalk toegeskryf word aan die dagbreek-verskynsel en die Somogyi-effek
Mense met diabetes kan in die oggend hoë bloedglukosevlakke ervaar en dit kan toegeskryf word aan die dagbreek-verskynsel of die Somogyi-effek. Lees verder om meer uit te vind oor hierdie twee verskynsels en hoe dit jou bloedsuikervlakke beïnvloed.
Slaap en bloedsuikervlakke
Jou liggaam gebruik glukose, ‘n soort suiker, vir energie. Glukose word in jou bloedstroom vrygestel. Dit is die hormoon, insulien, se werk om glukose uit jou bloedstroom na jou selle te vervoer.
Wanneer jy slaap, het jou liggaam nie soveel energie nodig nie, maar wanneer jou liggaam homself gereed maak om wakker te word, stel jou lewer gestoorde glukose in jou bloedstroom vry. Dit behoort die vrystelling van insulien te aktiveer sodat die glukose na die selle vervoer kan word.
Die probleem is dat mense met diabetes nie genoeg insulien maak nie of insulienweerstandig is. Dit veroorsaak dat glukose in die bloedstroom opbou en dus sal mense met diabetes soggens hoë bloedsuikervlakke hê.
Die dagbreek-verskynsel
Jou lewer stel soggens natuurlik glukose vry tussen 03:00 en 08:00. Mense met diabetes word wakker met hoë bloedsuikervlakke as gevolg van ‘n gebrek aan insulien- of inulienweerstandigheid.
Die Somogyi-effek
Sommige wetenskaplikes betwis of die Somogyi-effek ‘n werklike verskynsel is, maar dit lyk asof baie mense met diabetes daardeur geraak word.
Die Somogyi-effek veroorsaak ook ‘n styging in bloedsuikervlakke vroeg in die oggend. Die styging in bloedsuikervlakke is nie omdat jou liggaam homself gereed maak om wakker te word nie. Die styging gebeur eerder omdat jou bloedsuikervlakke skerp gedaal het gedurende die nag, en jou liggaam reageer deur hormone vry te stel wat insulien inhibeer. As gevolg van die hormone se inmenging, sal jy wakker word met hoë bloedsuikervlakke.
Die Somogyi-effek word toegeskryf aan verskeie faktore soos om te veel insulien of diabetesmedikasie te neem voordat jy gaan slaap of om nie ‘n voldoende aandete te eet nie.
Is dit die dagbreek-verskynsel of die Somogyi-effek?
Om te weet of jy deur een van hierdie fenomene geraak word, moet jy jou bloedsuikervlakke gereeld en op spesifieke tye nagaan.
Jy wil jou bloedsuikervlakke elke dag op die volgende tye nagaan:
- net voor jy gaan slaap
- in die vroeë oggendure, tussen 2:00 en 3:00 (as jou bloedsuikervlakke aansienlik laag is gedurende hierdie tyd, kan dit as gevolg van die Somogyi-effek wees)
- eerste ding in die oggend
Wat kan ek doen om my bloedsuikervlakke te verlaag?
Om hoë bloedsuikervlakke soggens te verlaag, moet jy jou roetine in die aand aanpas.
Vermy die eet van hoë-GI-voedsel voor slaaptyd
As jy soet en koolhidraat-gevulde kosse voor slaaptyd eet, sal jou bloedsuikervlakke piek en dit sal die dagbreek-verskynsel vererger.
Eet aandete
As jy aandete oorslaan, kan jou bloedsuiker gedurende die nag aansienlik daal en kan jy die Somogyi-effek ervaar.
Doen ligte oefening
Oefening in die aand, soos stap of joga, kan help om jou bloedsuikervlakke gedurende die nag stabiel te hou.
Neem jou insulienmedikasie op die regte tyd
Praat met jou dokter voordat jy jou insulien of medikasie aanpas, aangesien dit ander gesondheidseffekte kan hê. Dit is raadsaam om jou insulien of medikasie te neem voor jy gaan slaap.
Wanneer om jou dokter te sien
Dit is belangrik om jou dokter te sien as jou bloedsuikervlakke gereeld soggens hoog is. Die Nasionale Instituut vir Diabetes en Spysverterings- en Niersiektes (NIDDK) beveel aan om jou dokter te sien as jou bloedsuiker meer as drie keer in ‘n tydperk van 2 weke hoog is.
Jou dokter kan voorstel om ‘n deurlopende bloedsuikermonitor te kry. Hierdie toestelle meet jou bloedsuikervlakke gereeld. Sommige van hierdie toestelle kan aan ‘n slimfoontoepassing koppel – wat beteken dat jy jou glukosevlakke maklik kan nagaan. Verder kan jou dokter jou medikasie aanpas sodat jy die regte hoeveelheid insulien kry om jou bloedsuikervlakke stabiel te hou.
Samevatting
As jy soggens met hoë bloedsuikervlakke sukkel, kan dit wees as gevolg van die dagbreek-verskynsel of die Somogyi-effek. Gaan jou bloedsuikervlakke gereeld en op die regte tye na om te sien of jy deur een van hierdie verskynsels geraak word. Praat met jou dokter oor die hoeveelheid en die regte tyd om insulien en diabetesmedikasie te neem. Jy kan ook jou aandroetine aanpas om jou bloedsuikerlesing in die oggend te verlaag.
