Hou jou bloedsuikervlakke stabiel tydens sosiale geleenthede
Jy hou dalk nie van die idee om uit te eet as jy diabetes het nie. Jy wil tog nie hê jou bloedsuikervlakke moet die hoogte inskiet by sosiale geleenthede nie.
Wanneer jy uiteet, kan jy lasagne, roomys, geroosterde aartappels en 'n magdom ander vyande teëkom wat smullekker smaak. Jy kan ook toegee aan sosiale druk en kos eet wat jy gewoonlik nie jou lippe aan sou sit nie.
Hoe geniet jy jou tyd uit terwyl jy jou bloedsuiker stabiel hou?
In hierdie artikel kyk ons na:
- Wenke vir ʼn aansitetes
- Wenke vir 'n bring-en-braai
- Wenke vir restaurantbesoeke
- Monitor jou bloedsuikervlakke
Wenke vir aansitetes
Jy mag dalk onbeskof voel wanneer jy ‘n maaltyd by iemand se huis eet net om baie geregte van die hand te wys.
Wanneer jy vir 'n ete na iemand se huis genooi word, het jy twee opsies. Jy kan die gasheer vooraf van jou toestand in kennis stel of jy kan die beste maak van die kos wat bedien word.
Jou gasheer weet jy het diabetes
Dit is die beste om familie en goeie vriende van jou toestand te vertel. Jou geliefdes sal jou waarskynlik prys omdat jy by gesonde gewoontes hou en jou gesondheid wil verbeter.
Hulle kan jou ondersteun deur lae-koolhidraatgeregte by maaltye te voeg of dalk sal hulle dit nie afstootlik vind as jy 'n paar gesonde geregte na byeenkomste saambring nie.
Die eet van diabetesvriendelike kosse is noodsaaklik vir jou gesondheid, maar hierdie disse is ook wonderlik vir diegene wat nie met diabetes sukkel nie. Om gesond te eet is immers goed vir almal!
Jou gasheer weet nie jy het diabetes nie
As jou gasheer nie bewus van jou gesondheidsprobleme is nie, kan jy die situasie hanteer deur goeie porsiebeheer toe te pas.
As jou gasheer byvoorbeeld pasta en slaai bedien, skep slegs ‘n bietjie pasta en baie slaai.
As jy steak (biefstuk) en gebakte aartappels bedien word, help jouself aan 'n groot stuk vleis en net 'n halwe aartappel.
Volg die bordmetode wanneer jy opdis. Die metode stel voor dat jy:
- Die helfte van jou bord vul met vrugte en groente
- ‘n Kwart met proteïene
- 'n Kwart met koolhidrate
Wanneer dit by nagereg kom, moet jy dit dalk van die hand wys of net 'n klein porsie geniet.
Wenke vir 'n bring-en-braai
Die lekker ding van 'n Suid-Afrikaanse bring-en-braai is dat dit gewoonlik redelik informeel is. Jy kan jou vleis, moontlik ’n bykos en peuselhappies saamneem na die kuier.
Volg die volgende wenke:
- Kies om hoender of beesvleis eerder as vetterige boerewors of tjops te braai.
- Neem diabeetvriendelike peuselhappies soos biltong, springmielies of lae-GI-koekies saam.
- Geniet 'n paar gesonde bykosse soos ‘n slaai met babaspinasie en kekerertjies, gebakte portobello-sampioene of lae-GI braaibroodjies.
Wenke vir restaurantbesoeke
Hier is 'n paar voorstelle vir wanneer jy by 'n restaurant uiteet:
- Kies gestoomde of gekookte opsies soos gestoomde rys, groentenoedels en geroosterde vleis- of visgeregte.
- Vra vir voedsame, lae-vet opsies. Restaurante is dikwels ervare met dieetbeperkings.
- Bestel ekstra gesonde bykosse soos slaai en groente om jou maaltyd meer gebalanseerd te maak.
- Monitor porsiegroottes, kies vars vrugteslaai of deel ‘n ryker nagereg met iemand.
- Beplan vir ‘n stappie voor of ná die ete om bloedsuikervlakke stabiel te hou.
- Moenie voel jy moet jou hele bord leeg eet nie. Neem oorskiet huis toe.
- As jy insulien gebruik, pas jou tydsberekening aan as jou maaltyd vertraag.
Monitor jou bloedsuikervlakke
Neem jou glukosemonitor saam wanneer jy uiteet. Meet jou bloedsuikervlakke ongeveer ‘n uur ná die maaltyd.
Oorweeg om in ‘n deurlopende glukosemonitor te belê – dit maak dit makliker om jou vlakke dop te hou en is dikwels koppelbaar aan slimfone.
Samevatting
Om uit te eet saam met vriende, familie of kennisse behoort pret te wees – selfs al het jy diabetes. Jy moet net slim wees oor wat jy eet. Volg hierdie wenke en geniet jou tyd rondom die etenstafel sonder om jou gesondheid in die gedrang te bring.
