Werk insulienweerstandigheid teë deur jou dieet aan te pas.
Insulienweerstandigheid is die voorloper van diabetes. Om met diabetes te leef is lewensveranderend en die gesondheidskomplikasies is ernstig. Gelukkig is daar baie leefstylveranderinge wat jy kan maak om insulienweerstandigheid te vermy of om te keer. Een manier om dit te doen is om jou dieet te verander. Daar is sekere kosse wat insulienweerstandigheid vererger, as jy hierdie kosse kan beperk of uit jou dieet kan sny, kan jy dalk diabetes vermy.
Lees verder om meer uit te vind.
Wat is insulienweerstandigheid?
Jou liggaam gebruik glukose as energie. Wanneer jy koolhidrate eet, sal jou liggaam dit afbreek tot glukose en dan die glukose in jou bloedstroom vrystel. Dit sal jou bloedglukosevlakke laat styg.
Wanneer jou bloedglukosevlakke hoog is, sal jou pankreas die hormoon, insulien, vrystel.
Insulien werk soos ‘n afleweringsvragmotor. Dit vervoer glukose vanaf jou bloedstroom na jou selle en wanneer glukose by die selle afgelewer word, keer jou bloedglukosevlakke terug na normaal.
Jy kan insulienweerstandig raak, wat beteken dat jou selle nie die hormoon effektief kan gebruik nie. As jy insulienweerstandig is, sal glukose in jou bloedstroom opbou.
Die pankreas reageer op die opeenhoping van glukose deur nog meer insulien vry te stel. Jou pankreas pomp nou hope insulien uit en solank die pankreas dit kan volhou, sal jou bloedsuikervlakke relatief stabiel bly.
Maar jou pankreas sal nie kan tred hou met die oormatige produksie van insulien nie. Wanneer dit gebeur, sal jou bloedsuikervlakke chronies hoog wees, en dit is die beginpunt van diabetes.
Dit is bemoedigend dat insulienweerstandigheid omkeerbaar is deur leefstylveranderinge aan te bring. Jy kan die aaklige gesondheidskomplikasies van diabetes vryspring! Een van die beste maniere om insulienweerstandigheid teë te werk, is deur minder voedsel te eet wat jou bloedsuikervlakke vinnig laat piek.
Watter kosse dra by tot insulienweerstandigheid?
Voedsel hoog op die GI-indeks
Die GI-indeks (ook bekend as die glukemiese indeks) is ‘n maatstaf van hoe vinnig en hoeveel ‘n spesifieke soort kos ‘n persoon se bloedsuikervlakke sal verhoog. Voedsel met ‘n hoë GI-indeks sal ‘n vinnige styging in bloedsuiker veroorsaak en dié met ‘n lae GI-indeks sal ‘n stadiger, meer geleidelike styging veroorsaak. Sommige kosse hoog op die GI-indeks sluit in:
- Wit rys
- Witbrood
- Aartappels
- Kitshawermout
Verwerkte voedsel
Verwerkte voedsel kan ‘n beduidende impak op insulienweerstandigheid hê en kan dit baie moeiliker maak om bloedsuikervlakke te bestuur. Hierdie kosse is gewoonlik hoog in kalorieë, vet en suiker. Vermy koeldrank, bokskos, lekkergoed, roomys, brood, pasta en ander verwerkte produkte. Kies eerder vars produkte, vleis en seekos.
Voedsel met versadigde en transvette
Versadigde vette kom in rooivleis, hoender en suiwel voor. Transvette is in margarien, kitskos en gebraaide kosse. Hierdie vette verhoog insulienweerstandigheid.
Versoete drankies
Koeldrank, sportdrankies en versoete tee en koffie bevat baie suiker wat vinnig bloedsuiker verhoog.
Alkohol
Alkohol bevat koolhidrate en kan hipoglukemie veroorsaak as dit saam met sekere medikasie geneem word.
Wat moet ek eet?
Voeg meer kosse by jou dieet wat jou bloedsuikervlakke stadig laat styg:
Volgraan
Volgraan soos hawermout en quinoa bevat vesel wat vertering vertraag en help om bloedsuikervlakke stabiel te hou.
Vrugte en groente
Hoog in vesel en polifenole wat oksidatiewe stres bekamp en help met glukoseabsorpsie.
Maer proteïene
Bone, vis, tofu en pluimvee help om spiere en weefsel te bou en verminder insulienweerstandigheid.
Gesonde vette
Olyfolie, neute en avokado’s help met energie, vitamienabsorpsie en hormoonproduksie.
Samevatting
Insulienweerstandigheid is omkeerbaar. Beperk kosse wat bloedsuiker vinnig laat styg. Eet meer vars produkte en minder verwerkte kosse. Let op na die tipe vet wat jy verbruik en wat jy drink. Jy hoef nie jou gunsteling-etes prys te gee nie – stapel jou bord met gesonde vette, vrugte, groente, volgraan en maer proteïene.
